Neavttára bargun lea gaskkustit geahččái rollaolbmo jurdagiid ja dovdduid. Ovdanbuktinvuohkin neavttár geavaha hupmama, geahčastagaid, seavástagaid, rumašguttuid ja lihkastagaid. Go neavttár háliida čájehit rollaolbmo aŧeštusa ja eahpesihkkarvuođa, son dollá olggiid ovddosguvlui ja geahčastaga vuollin. Iešsihkaris rollas oaivi lea ceaggut ja muđuige njuolggočielggat.

Rollaolbmuid gaskasaš gaskavuođaid geahčči bastá meroštallat, mot olbmot gulahallet gaskaneaset ja makkár miellaláhki sis lea. Jus guokte rolla lávddis geahččaba nuppi nubbái dahje vázziiba nuppi guovdu, de geahččai sáhttá dulkot sudno leame beroštuvvan nubbi nuppis. Dustemin sáhttá dulkot jus jorgala oaivvi nuppeguvlui, eará guvlui geahččan dahje guhkeleabbui mannan.

TEÁHTERIS NEKTOJUVVO STUORRÁT

Ođđa čájálmasa várás neavttár oahpahallá vuorrosániid bajil. Seammás neavttár govahallá mot su rolla hupmá, maid jurddašallá ja mot dan jurdagiid ja miellaguottut gaskkustuvvojit gehččiide. Neavttár ja bagadalli maid suokkardallet mot rolla lihkada, makkár rumašguottut leat ja makkár lihkastagat.

Muhtumin neavttár šaddá ovdanbuktit seammá čájálmasas máŋggaid rollaid, ja dalle sierra rollaid ovdanbuktin ja lihkastagat galget sierranit čielgasit gaskaneaset. Rollaid gaskii eai boađe erohusaid dušše lávdebiktasiiguin.

Teáhtera lávddis ovdanbuktin galgá leat stuoris, vai dat oidno gitta maŋimuš beaŋgaráiddu gehččiid rádjái. Jus rollaolmmoš ovdamearkka dihte imaštuvvá, dušše čálmmiid stuorideapmi ii leat nohkka muhto imaštupmi galgá oidnot olles gorudis. Jietnage galgá gullot olles teáhtersálii. Jus rollaolmmoš savkkástallá nubbái juoidá, de son ferte neaktit savkkástallama. Duohtavuođas son ferte oalle garra jienain savkálit vai jietna gullo guhkás.

FILMMAS UNNANAI OVDANBUKTIN OIDNO

Maiddái filbmaneavttár álggaha rollasis ráhkkaneami vuorrosániid oahpahallamiin.