Rauma um jālgab Lǟnd-Sūomõs, kus jelāb pigātagā 40 000 rištīngtõ. Vanā Rauma um UNESCO mōīlmapärāndõks objekt. Raumas um ikš āinagi gimnazij, Rauma Litsej gimnazij (Rauman Lyseon lukio). Gimnazijõs um jemīņ äbku 700 oppijizt ja 50 opātijizt. Mäd skūol um seļļi irdzi gimnazij, kus võib tīedõ ämḍi kursidi, midā um vajāg abitur pierāst. Jel um nustõt 1952. āigastõs, bet pierrõ parāntimizt attõ klastubād paldīņ jõvās kȭrdas, ja neši attõ ūdāigalizt opātõbažād. Setfunktsijkuodā līb vaļmõz 2017. āigastõs. Skūolsõ mēg tōmõ īžkizt tǟdõl panda, kui oppimi lǟb jeddõpēḍin, ja äbţõ oppijiztõn, kus vajāg. Se um tǟdzi ažā, sīestõ ku Suomõs äb ūo klasīdi gimnazijõs, se tǟntõb ku oppijizt vēļõbõd īž jegās periodõs, mingiži kursidi ne võtābõd. Īdsõ skūolāigastõs um vīž periodõ. Amā gimnazij optõbāiga um kūolm agā nēļa āigastõ, ja lopāndõksõs um vȯļmõst kubsõ 75 kursõ.

Mäddõn attõ ka rovvajlizt kontaktõd, nägţõbõks Lyon oppijizt Frantsijõst sēršõbõd mäd jūsõ ja mēg Lyonsõ. Sigžõ 2017 īrgõb ūž tēmakurs, kus oppijizt mõtlõbõd ulzõ ja panābõd tuoimõl mingiz tuņtšlimiz iļ Vālda mier ilā. Plān um, ku sīestõ kazāb ulzõ võrgõ, kus munt Rauma ja Satakunta provints skūõlõd tīebõd kubbõtīedõ munt kūožõd skūolõdõks ja kuoŗŗõbõd īdskubs tǟdzizt informatsijõ, mis um amādõn kȭlbatõb.

Rauma Litsej gimnazijõs võib oppõ engõl, rūotš, saksā, prantsuz, spāņij, itālij ja krīevõ kīeldõ. Līvõ kīel kursõ mäddõn kajjõks kil äb ūo, bet až um vajāg, võib ikš opātiji skūolsõ siedā opātõ. Raumas um jõ īend vaļmõks amā ežmi līvõd skūolrōntõz. Se sugīz august kū 21. pǟval 1933. aigastõs Petäjäs nanās muzej jūodiji Jalmari Karhula sõvjelsõ, kus Pētõr Damberg vȯļ kui kutstõt kilāli. Se kūož äb ūo kougõņ Rauma Litsej gimnazij knaššõst skūoljelstõ.