Mihku beaivi

Na vuoi ii! Vuot ribahin oađđit menddo guhká, juo goalmmát geardde guovtte maŋimuš vahku áigge. Na juohan buollái hoahppu!

Mihkku lei vuot deaddilan veahkkára eret alde ja báhcán oađđit. Bargui galggašii geargat áiggil, otne lea dehálaš čoahkkin. Son jugista káffegohpa, čuohpasta láibevajahasa ja njuvddesta valjis vuoja ala. Dasto olggos ja bargui. Go Mihkku čuosku bussebissehaga guvlui, de jurdila vuot ahte galggašii vuot viššaleappot lihkadišgoahtit. Livččii suohtas spáppastallat, beare bargguin asttašii. Go hárjellagoađášii, de ii várra liigedeadduge šat nu váivvidivččii. Dán áigge olmmoš šieđđaluvvá dadjat juo duššis, iige boagánge šat oro leamen doarvái guhkki.

Barggus Mihkku ii dábálaččat astta boradit ráfis, ja nuba sus lea skáhpes álo cola- dahje energiijajugusboahtalat ja buđetvuolahasseahkat. Káfege son ribaha juhkat bargobeaivvi áigge moadde gievnnidievva. Lihkus bálle juoba sigareahta borgalit duollet dálle. Otne Mihkku lihkus astá finadit hamburgalačča borasteamen. Su mielas hamburgalaš lea dán hávege menddo veahtas. Iihan sáltti leat liikká nu divrras. Manin eai juo botkal eanebuš?

Ruoktot Mihkku olle easkka eahkedis ovcci maŋŋá. Son deaddila televišuvnna ala ja rabasta vuollaboahtala. Garra beaivi, son jurddaša ja geahčasta ádjás gova hildu alde. Leigo Ánde-ádjá áigge ná garas dat eallin? Ammal de lei, go áddjáge oaččui váibmodohppehallama ja jámistii ovdalgo gearggai deavdit vihttalogivihtta jagi. Dat gal lei vahát, go Mihkku ii albmaláhkai geargan oahpásmuvvat Ánde-áddjái. Lohket, ahte dat lei dakkáraš hearvás almmái.

Bb. Makkár váibmo- ja varrasuotnadávdda riskadahkkit leat muitalusas?