Ságastallamis lea álot juoga ulbmil. Ulbmilin sáhttá leat muitalit nubbái juoga man lea gullan, vásihan dahje lohkan. Muhtumin fas plánejuvvo juoga, evttohuvvo dahje dušše šláttarduvvo.

Skihpáriid gaskkas ságastallamat álget plánekeahttá. Muhtun dadjala juoga ja nubbi vástit, joatká, dahje kommentere. Dákkár ságastallama juohkehaš máhttá lunddolaččat, iige omd. sáhkavuoru dárbbaš geasage addit dahje nuppis dáhttut, eaige matge earáge njuolggadusaid olus leat. Dákkár lea friddja ságastallan.

Oahppodiimmuid áigge gártá juo dáhttut vuoru, loktet gieđa go áigu vástidit. Nu lea maid bargosajiin ja vaikkoba televišuvnnas ságastaladettiin. Dákkár ságastallamiin lea sierra, sohppojuvvon vierut ja dat ovdánit dihto láhkai. Čeahpes ságastalli ii gaskkalduhte iige hála nuppi sága ala.

Ságastaladettiin maid guldaleapmi lea dehálaš. Guldaleapmi lea eambbo go dušše gullan. Aktiivalaš guldaleaddji jorggiha hálli guvlui, geahččá sutnje, jearahallá, kommentere ja geavaha unna sánážiid (mmm..., na..., ale..., jo-o...) vai hálli oaidná, ahte nubbi duođaid guldala su.